Ég er Norðfirðingur í húð og hár og eins langt aftur og ættartöl leyfa. Ég er stolt af bænum mínum og fagna þessari frábæru heimasíðu hjá Norðfirðingafélaginu. Ég get tekið undir með Tryggva Ólafssyni og Sigga Nobb þegar ég segi að Múlinn sé fjallið og ég get opnað faðminn og hneigt mig þegar ég kem heim eftir að vera annars staðar á landinu eða erlendis. Ég lauk barnaskólanámi og fór þaðan í fyrsta bekk Gaggó þar sem Oddur Sigurjónsson var skólastjóri. Þaðan fór ég á Eiðaskóla. Segja má að í dag er ég full eftirsjár að hafa ekki gengið menntaveginn, en eins og Gunnar Ólafsson sagði þegar hann afhenti mér verðlaun í 5. bekk fyrir mestar framfarir í landsprófsgreinum, ég tel að þessi bók eigi vel við því Elma er haldin einstakri útþrá og forvitni um aðrar þjóðir. Bókin var Fjarlæg lönd og framandi þjóðir eftir Rannveigu Tómasdóttur. Inn í bókina skrifar Magnús Guðmundsson með sinni einstöku fögru rithönd. Bókina hef ég marglesið og meðal annars heimsótt tvo af þeim stöðum sem bókin fjallar um, Mexíkó og Bahamaeyjar, á Bermuda eftir. Ég var 10 eða 12 ára gömul þegar ég vann við að stakka saltfisk og 13 ára þegar ég saltaði fyrstu síldarnar. Vann svo sem unglingur við síldarsöltun og í Súninu. Það væri að æra óstöðugan að telja allt það upp sem ég hef tekið mér fyrir hendur en það er allt frá því að vera síldarstúlka á unga aldri til að vera ritstjóri og blaðamaður á Austurlandi um árabil og fetaði þar í fótspor ekki ómerkari manns en Bjarna Þórðarsonar. Ég var gift Jóni Einari Jóhannssyni, syni Jóa sterka og Soffíu á Mel. Við eigum tvö börn Petrúnu Björgu fædda 1962 og Jóhann Frey fæddan 1975. Við skildum fyrir nokkrum árum. Petra á 3 börn og 4 barnabörn, Jóhann á 3 börn og það fjórða á leiðinni. Ég á sem sagt tvö börn, sex barnabörn og fjögur barnabarnabörn. Sem sagt moldrík. Í dag er ég löggilt gamalmenni. Ég er í dag formaður Félags eldri borgara á Norðfirði, en hef áður verið formaður Þróttar og UÍA og er ekki hægt að líkja því saman. Mér hefur hlotnast margvíslegur heiður fyrir störf mín að félagsmálum og vænst þykir mér um gullmerki ÍSÍ, sem ég fékk 1993. Ég ætla að láta þessa upptalningu duga að sinni en mun smám saman setja inn fleiri færslur og myndir.