Allir þeir hæfileikaríku listamenn sem tóku þátt í að gera afmælis hátið Norðfirðingafélagsins svo veglega fá okkur bestu þakkir. Það er óendanlega dýrmætt að eiga aðgang að svo mörgu hæfileikaríku fólki sem allt er tilbúið að leggja sitt af mörkum fyrir félagið okkar. Sr. Svavar Stefánsson og starfsfólk Fella-og Hólakirkju, sem er orðinn fastur samastaður Norðfirðingafélagsins í Reykjavík, fá bestu þakkir fyrir samstarfið. Síðast en ekki síst þá vil ég þakka þeim fjölmörgu Norðfirðingum og öðrum sem komu á hátiðina og gerðu þetta allt að svo notalegum tíma. Ég vil svo minna á næstu viðburði félagsins:

Næsti viðburður á vegum félagsins er MORGUNKAFFI í Kaffitári í Kringlunni laugardaginn 6. desember frá kl. 09:30. Þessir viðburðir eru í umsjá Jóns Karlssonar og Hákons Aðalsteinssonar.

Þann 20. desember verður Bænastund með Sr. Svavari Stefánssyni í Fella og Hólakirkju kl. 17:00. Þessi bænastund var fyrst haldin árið 2004 þegar minnst var að 30 ár voru liðin frá snjóflóðunum í Neskaupstað. Það er ávallt hollt í jólaundirbúningnum að eiga kyrrðarstund með Norðfirðingum.

Gísli Gíslason
Formaður Norðfirðingafélagsins.