Hópur austfirskra kvenna sem allar eru búsettar á Norðfirði munu sýna myndir og málverk í kaffihúsinu Gónhól á Eyrarbakka frá 4.- 30. júní 2010.

Allar eru konurnar starfandi við önnur störf en áhugi þeirra á myndlist til margra ára hefur sameinað þær í einn hóp sem starfað hefur saman í um 12-15 ár í húsnæði Listasmiðjunnar, Þórsmörk.

Gegnum árin hafa þær sótt námskeið, utan lands sem innan en einnig haldið námskeið fyrir almenning sem leidd hafa verið af hinum ágætustu listamönnum s.s. Öldu Ármönnu Sveinsdóttur,  Þuríði Sigurðardóttur, Valgarði Gunnarssyni og Kristbergi Péturssyni svo einhverjir séu nefndir.

Konurnar eru:  Anna Bjarnadóttir, garðyrkjufræðingur;  Berglind Þorbergsdóttir, aðalbókari;  Hildur B. Halldórsdóttir, ljósmóðir; María Teresa Goncalves, hjúkrunarfræðingur og Theodóra Alfreðsdóttir, bóndi.

Flestar eru myndirnar unnar í olíu og akrýl en einnig vatnslitum og er meginþema myndanna gjarnan tekið úr austfirsku umhverfi s.s. fjöllin og fjörðurinn en einnig gætir þar fleiri grasa.

Sýningin er styrkt af Hlaðvarpanum, Menningarsjóði  kvenna á Íslandi og kunnum við þeim bestu þakkir fyrir.