Allir Norðfirðingar þekkja Kelahæðina og þeir elstu muna eftir Kelaskúrunum. Aðrir skúrar standa nú þar og tengjast ekkert þessari frásögn.
   Í byrjun 20. aldarinnar þótti vænlegt að stunda útróðra frá Norðfirði, stutt var á fengsæl fiskimið. Bryggjur og bryggjustúfar voru þá meðfram allri ströndinni allt að 40 talsins.
   Meðal þeirra sem stunduðu útróðra frá Norðfirði á þessum tíma voru þremenningarnir; Stjáni blái, Kristján Jónsson , en um hann gerði Örn Arnarson kvæðið ódauðlega um Stjána bláa, Oddur Sigurgeirsson sem kallaður var "hinn sterki af Skaganum" og Sæmundur sífulli, sem þótti bera nafn með rentu. Ekki versnaði flóran í Kelaskúrnnum þegar þeir þremnningarnir fengu sér ráðskonu, var hún frá Vestmannaeyjum og bar hún hið geðþekka nafn Lauga lausgirta. Og segir Þorsteinn Víglundsson í bók sinni um viðurnefni manna í Vestmannaeyjum að það nafn hafi hún borið með rentu.

Sjóhúsin á myndinni eru sjóhús Hjartar Arnfinnssonar og Sævars Jónssonar Morits. Þeir standa nokkru austar en “Kelaskúrarnir” stóðu. Ljósm. Elma.

Elma Guðmundsdóttir tók saman. Heimildir Norðfjarðarsaga og fleiri skriflegar heimildir.